المهندس صلاح النشار يكتب … مجلس النواب ….. والسادة المرشحين
![](https://i0.wp.com/embassies.news/wp-content/uploads/2020/10/IMG_٢٠٢٠١٠١٣_٠٧٠٥١٧.jpg?resize=384%2C407&ssl=1)
بقلم صلاح النشار :
اثناء تفقدى اليوم بالشارع المصري لمتابعة مرشحى مجلس النواب وبما يكتب على بانراتهم وجدت أن أعضاء مجلس النواب كلهم وخاصة النواب بالدورة المنتهية كاتبين شعار مرشح الغلابه ومن أجل الغلابه والفقراء ومن أجل الفقراء والمساكين ههههه خلونا مساكين سبحان الله
انا بقى بقول لكم هو انتم مش بتعرفو أن فيه غلابه وفقراء ومساكين غير وقت الدعاية الانتخابية فقط طب حضراتكم لو انتم حاسين وعارفين أن فيه غلابه وفقراء ومساكين ليه فى المجلس المنتهى اللى حضراتكم كنتو ممثلين الشعب فيه وافقتو على كل القوانين اللى ضد الشعب من مصالحات وهدم مبانى وتشريد أسر ومن ارتفاع الضرائب والرسوم الترخيصيه وارتفاع الشريحه التأمينية لدى أصحاب المشاريع الصغيرة والمتوسطة والمتتاهية الصغر لماذا وافقتو على الغلاء المعيشي الفاحش على المواطنين ماذا قدمتم وشرعتم للعماله الخاصه لدى أصحاب المصانع من حماية لهم وغيره وغيره ولو ذكرنا سوف نكتب صفحات وصفحات على عيوبكم وسلبياتكم فى المجلس المنتهى يامرشحين الغلابه اعتقد انكم كنتم مشغولين بجمع ماصرف فى الدعاية الانتخابية السابقة وجمع ملايين الجنيهات لتدفعوها حاليا لحجز كراسى فى البرلمان القادم
حضراتكم افسدتم الحياة السياسية والاقتصادية والاجتماعية فى مصر بل والحياة الثقافيه أيضا
ارجوكم كفاية كده عليكم دورة سيبو الناس الجدد اللى لايمتلكون مصاريف. الدعايه للاعلان عن نفسهم يمكن واعتقد أنهم سيكونون افضل منكم بكثير لأنهم من طبقه الشعب فعلا المطحونة هم من يطلق عليهم مرشحين الغلابه بجد لأنهم متعايشين مع ظروف الشعب المصري وحاسين به هو لما حضرتك تدفع ملايين علشان البرلمان يبقى حضرتك ناوى تقدم ايه ولا اكيد تانى سوف تكون مشغول بأضعاف أضعاف أضعاف ما دفعته للحصول على الكرسى
ابعدو بقى احنا تعبنا اقسم بالله الشعب مالاقى يصرف على بيته خلاص وكل ده بينعكس على القيادات السياسية بالدولة حرام عليكم كفاية حرمتونا من الاكل والملبس وحرمتو اولادنا من الزواج والعمل والعبشه الكريمة بتترشحو تانى ليه عاوزين تكملة على ماتبقى من رفات الشعب لسه المهمه لم تكتمل طب أنا موافق انكم تترشحو بس ابعدو عن الرشاوى واستغلال الناس واتركوهم يعطو صوتهم بحرية اتفضلو حضراتكم اقعدو فى بيوتكم وانتظروا النتائج ممكن ينجح منكم ناس بالفعل لأن ليس الجميع سئ اكيد كان فيه ناس محترمه ونزيهة أتركو الشعب يختار ممثلينه وبلاش اغراءات الفلوس والكرتونه وانا متأكد من وعى الشعب أنه هايختار الافضل واخيرا أوجه كلمة صغيرة لإخواننا المصريين أعطى صوتك لمن يستحقه ولو لمرة واحدة أعطى صوتك لمن يفيدك لمن يوصل صوتك حتى الآن لم ادعم مرشح ولن أعطى صوتى لمرشح الا بعد دراسة واقتناع
واخيرا اقولها
ربنا أن شاء الله وبامره يولى من يصلح ومن فيه الخير للبلاد والعباد
نحيا جميعا وتحيا بنا مصر
اللهم احفظ مصر واهلها الطيبين الطاهرين الأشراف واحفظ قياداتها وجيشها وشرطتها من كل سوء وشر يارب العالمين
كاتب المقال : امين عام حزب الثورة